काठमाण्डौ । नेपाल वायुसेवा निगमका बरिष्ठ पाइलट बिजय लामा निलम्बनमा परेका छन् । निगमका प्रवक्ता समेत रहेका लामाले हालै एक युट्यूबमा च्यानलमा विवादास्पद अन्तर्वार्ता दिएको भन्दै नेपाल नागरिक उड्यन प्राधिकरणले नेपाल वायुसेवा निगमलाई लामालाई तत्काल निलम्बन गर्न निर्देश दिएको हो । 

 

केही दिनअघि एक युट्यूब च्यानलमा अन्तर्वार्ता दिने क्रममा पाइलट लामाले आफू मानसिक तथा शारीरिक तनावमा रहने र राम्रोसँग निद्रा पनि नलाग्ने बताएका थिए। 

सार्वजनिक मिडियामा नेपाल वायुसेवा निगमको आन्तरिक विषय सार्वजनिक गरेको र यात्रुको सुरक्षामा ध्यान नदिएको भन्दै पाइलट लामाबारे छानबिन गर्न नेपाल नागरिक उड्यन प्राधिकरणले छानबिन समिति गठन गरेको थियो । 

 

पाइलट लामाले उडानका क्रममा आफू शारीरिक र मानसिक रुपमा तनावमा रहने अन्तर्वार्ता दिएकाले उहाँको उडानका क्रममा यात्रुले सुरक्षित महसुस गर्न नसक्ने भन्दै प्राधिकरणले उहाँलाई बर्खास्तको लागि नेपाल वायुसेवा निगमलाई निर्देशन दिएको छ । शुक्रबार बसेको क्यानको बैठकले लामालाई तत्कालका लागि निलम्बन गर्न निर्देशन दिएको निगमका एक अधिकारिले जानकारी दिए ।

 

‘‘उहाँ नेपाल वायुसेवा निगमका प्रवक्ता पनि हुनुहुने रहेछ, प्रवक्ताले नै एअरलाइन्सको बारेमा निकै नकारात्मक धारणा राखेको पाइयो, त्यसमाथि यात्रुको सुरक्षामा गम्भीर लापर्वाही गरेको देखिएकाले उहाँलाई हटाउन निगमलाई निर्देशन दिएका हौँ ।’ प्राधिकरणका एक अधिकारीले भने । 

 

पाइलट लामालाई प्रवक्ताको पदमा रहुञ्जेल जहाज नउडाउन र उहाँले अन्तर्राष्ट्रिय  नागरिक उडड्यनसँग सम्बन्धित केही नियम नजानेकाले नियम सिकाउन पनि निर्देशन दिइएको प्राधिकरणले जनाएको छ । 

नेपाल वायुसेवा निगम नेपाल नागरिक उड्यन प्राधिकरण