झापा । पूर्वपश्चिम राजमार्गअन्तर्गत झापाको कन्काई नदीको पुलमा प्रेसर कुकर बम जस्तो देखिने शंकास्पद वस्तु फेला परेको छ । नदीको पूर्वतर्फको मुखैमा आइतबार बिहान उक्त शंकास्पद वस्तु भेटिएको हो।

शंकास्पद वस्तु फेला परेसँगै कन्काई पुलको दुबैतर्फ सयौँको संख्यामा सवारी साधन रोकिएका छन्। मर्निङवाकमा निस्किएका मानिसहरूले पुलमा शंकास्पद वस्तु देखिएपछि प्रहरीलाई खबर गरेका थिए ।

कनकाइ नगरपालिका-२ स्थित पुलमाको दायाँ तर्फ तारले बेरिएको कुकरसँगै एउटा घडी पनि रहेको जिल्ला ट्राफिक प्रहरी कार्यालय झापाका प्रमुख, प्रहरी निरीक्षक होम अधिकारीले जानकारी दिए । उनका अनुसार उक्त स्थानलाई प्रहरीले घेरा हालेर राखेको छ भने नेपाली सेनाको श्रीनाथगण चारआलीको बम डिस्पोजल टोली पुगिसकेको छ ।

बम नजिकै गोर्खा जनमुक्ति मोर्चाको पर्चासमेत फेला परेको प्रहरीले जनाएको छ । पर्चामा संघीयता खारेज गर, सुगौली सन्धिको भूमी फिर्ता गर, भ्रष्टाचार नियन्त्रण गर, सम्पूर्ण अंगीकृत नागरिकता खारेज गर लगायतका माग उल्लेख छ ।

प्रेसर कुकर बम