काठमाडौँ । प्रधानमन्त्री कप राष्ट्रिय क्रिकेट प्रतियागितामा प्रदेश–२ ले सानदार जित हासिल गरेको छ । प्रदेश नं २ ले कर्णाली प्रदेशलाई ९ विकेटले पराजित गर्यो  । मुलपानीस्थित क्रिकेट रंगशालामा बुधबार भएको खेलमा कर्णाली प्रदेश प्रदेश २ सामु निरीह सावित भयो । 

टस जितेर पहिले ब्याटिङ गरेको कर्णाली प्रदेशले निर्धारित ५० ओभरको खेलमा ९४ रनको सामान्य लक्ष्य मात्र पेश गर्न सक्यो ।  कर्णालीका लागि प्रकाश जैशीले ३७ रन बनाए भने कप्तान रविन्द्रजंग शाहीले १४ रन मात्र जोड्न सके । बाँकी नौ जना ब्याट्सम्यानले १० रन पनि कटाउन सकेनन् ।

कर्णाली प्रदेश ९३ रनमा अलआउट भएपछि ९४ रनको लक्ष्य पछ्याएको प्रदेश–२ ले १६ ओभरमा १ विकेट गुमाएर ९६ रन बनाउँदै लक्ष्य पूरा गर्यो  । प्रदेश नम्बर २ का लागि ओपनिङ ब्याट्सम्यान हरिशंकर शाहले नटआउट रहँदै ५५ रन बनाए । उनले ६४ बलमा ७ चौकाको मद्दतमा ५५ रन बनाएका हुन् । 

प्रदेश नं २ का लागि हसिम अन्सारीले १७ रन बनाउँदा रवि शाहले १६ रन बनाए । प्रदेश २ विरुद्ध कर्णालीका प्रकाश जैसीले १ विकेट लिए । पहिलो जितसँगै प्रदेश–२ ले अंक तालिकामा २ अंक जोडेको छ ।