काठमाडौँ । मुक्तिनाथ केबलकारको विस्तृत परियोजना प्रतिवेदन (डिपिआर) तयार गर्नुअघि सर्भे गर्न  अष्ट्रेलियाबाट जहाज नेपाल आइपुगेको छ । 

 

मौसमले साथ दिएमा तुरुन्तै डिपिआरको काम थालिने मुक्तिनाथ दर्शन प्रालीले जानकारी दिएको छ ।  अष्ट्रेलियाबाट चार दिन लगाएर सो जहाज बुधबार नेपाल आइपुगेको हो । सर्भेका लागि जहाजमा लेजरलाइटलगायत उपकरण जडान भइसकेको छ ।

 

कास्कीको नयाँपुलदेखि मुस्ताङको मुक्तिनाथसम्म चल्ने केवलकारका लागि ८४ किलोमिटर दूरीमा सर्भे गरिनेछ । सर्भे १० दिन जतिमा सकिने विश्वास लिइएको छ । सर्भेमा नापी विभागका प्रतिनिधि र मुक्तिनाथ दर्शन प्रालीका प्रतिनिधि सहभागी हुनेछन् । 

 

८३ दशमलव ६५ किलोमिटर लम्बाइ रहने उक्त केवलकारमा १९ वटा स्टेशन रहनेछन् । शुरुवातको स्टेशन वीरेठाँटी वा नयाँपुलमा हुनेछ । त्यसपछि टिकेढुङ्गा घोरेपानी, सिखा पाखरेबगर, तातोपानी, काभ्रे, घासा हुनेछन् ।

 

 त्यसपछि कालोपानी लेते, कोवाङ चोखोपानी, टुकुटे, मार्फा, जोमसोममा पनि स्टेशन हुनेछन् । त्यस्तै कागबेनीमा अर्को स्टेशन र अन्तिम स्टेशन मुक्तिनाथमा हुनेछ । आठवटा स्टेशनमा यात्रुहरु अनिवार्य रुपमा झर्नुपर्ने र वक्स परिवर्तन गर्नुपर्ने हुन्छ ।

 

आयोजनाको कूल लागत करिब ५० अर्ब हुने बताइएको छ । यो केबलकार निर्माण भएमा विश्वकै लामो केबलकारका रुपमा दर्ता हुन सक्नेछ ।