काठमाडौं । सरकारले गरेको कर्मचारी समायोजनप्रति कर्मचारीको ठूलो हिस्सा असन्तुष्ट भएको छ । करिब १२ हजार कर्मचारीले समायोजनबाट आफूलाई मर्का परेको भन्दै गुनासो भरेको संघीय मामिला तथा सामान्य प्रशासन मन्त्रालयले जनाएको छ । १४ चैतमा समायोजन सकिएको थियो ।

 

समायोजनमा असन्तुष्टलाई मन्त्रालयले २० चैतसम्म गुनासो भर्ने मौका दिएको थियो । अधिकांश कर्मचारीले फाजिलमा परेको, घरपायक नपरेको, ज्येष्ठता नमिलेकोलगायत गुनासा गरेका छन् । दर्ता भएका गुनासा केलाएर हेरिरहेको मन्त्रालयले जनाएको छ । कतिपय कर्मचारीले दोहोर्याएर  गुनासो गरेको मन्त्रालयको भनाइ छ ।

 

करिब आधा हिस्सा गुनासोको सुनुवाइ टुंग्याइसकेको मन्त्रालयका सहसचिव रुद्रसिंह तामाङले जानकारी दिए । समायोजनले संघमा झन्डै ४८ हजार कर्मचारीको दरबन्दी कायम गरेको थियो । संघमा कर्मचारीको संख्या बढी भएपछि सरकारले दरबन्दी कटौती गर्ने जनाइसकेको छ । यो समाचार नयाँ पत्रिका दैनिकबाट लिइएको हो । 

कर्मचारी समायोजन असन्तुष्ट