काठमाडौँ । प्रधानमन्त्री केपी शर्मा ओली बुधबार मालपोत कार्यालय कलंकीमा पुग्नुभयो । कलंकीस्थित मालपोत कार्यालयलाई ‘नमूना मालपोत कार्यालय’ घोषणा कार्यक्रमका लागि उहाँ कलंकी पुग्नुभएको हो । त्यसक्रममा उहाँले २ वर्ष भित्र देशका सबै मालपोत कार्यालयहरुलाई प्रविधिमैत्री बनाउने घोषणा पनि गर्नु भयो । 

 

चित्त दुखाइका विषय थाँती राख्नुस 
कार्यक्रममा प्रधानमन्त्री ओलीले राष्ट्र निर्माणको अभियानमा एकजुट हुन सबैलाई आह्वान गर्नु भयो । कतिपय चित्त दुखाईको विषयलाई पनि थाँती राखेर राष्ट्र निर्माण गर्ने अभियानमा जुटन उहाँले सबैलाई आह्वान गर्नु भएको हो । प्रविधिको प्रयोगबाट मुलुकलाई समृद्ध बनाउने अभियानमा सरकार लागि परेको उल्लेख गर्दै त्यस अभियानमा सबैको साथ र सहयोग जरुरी रहेको पनि बताउनु भयो ।

 

उहाँले मुलुकमा रहेको वन, जंगल लगायतका स्रोतहरुलाई प्रविधिको प्रयोग गरेर विकास गरी मुलुकमा एक करोड बढि पर्यटक भित्र्याउने सम्भावना रहेको दावी पनि गर्नु भयो । त्यसका लागि प्रविधिको प्रयोग गरेर विकासको प्रयासलाई अघि बढाउने सरकारको अभियानमा सबैले सहयोग गर्नुपर्ने प्रधानमन्त्री ओलीको भनाई छ ।

 

प्रधानमन्त्री ओलीले ‘नेपाल भ्रमण वर्ष–२०२०’ मा २० लाख पर्यटक भित्र्याउन प्रयास गरिरहनु परेको उल्लेख गर्दै यहाँको प्राकृतिक स्रोतहरुको विकास गरी सरकारले एक करोड बढि पर्यटक भित्रयाउन सक्ने सम्भावना रहेको पनि उल्लेख गर्नु भयो ।

 

कार्यक्रममा भूमि व्यवस्था, सहकारी तथा गरिवी निवारणमन्त्री पदमा अर्यालले सेवाग्राहीहरुलाई सहज ढंगले सेवा         पु-याउने गरी कलंकी मालपोत कार्यालयलाई नमूना मालपोत कार्यालयको रुपमा विकास गरिएको बताउनु भयो । उहाँले २ वर्ष भित्र सबै स्थानीय तहहरुमा पनि प्रविधिले युक्त मालपोत कार्यालयहरुको विकास गर्ने योजना पनि सुनाउनु भयो ।