राष्ट्रिय जनता पार्टीका सांसद महन्थ ठाकुरले सरकार कानुनमार्फत मधेसी जनताको अधिकार कटौतिको षड्यन्त्रमा लागेको आरोप लगाउनुभएको छ । 

प्रतिनिधिसभाको विहिबारको बैठकमा विनियोजन विधेयकमाथिको छलफलमा सहभागी हुदै उहाँले कानुनी रुपमा नै अधिकार कटौतिको खेलमा लागेको दावी गर्नुभयो । उहाँले भन्नुभयो– “यो संविधानले एउटा विभाजन श्रृजना गरेको छ– राज्य र विभिन्न समुदायको बीचमा । एकअर्काप्रति सशंकित छ । यसले पहाड र मधेसको बीचमा एउटा विभाजन रेखा कोरेको छ । जसरी यहाँ लाल बत्ती बल्नासाथ अभिव्यक्ति बन्द हुन्छ । आज कानुनद्वारा लालबत्ती बल्दैछ । हरेक कानुनमा केही न केही लालबत्ती राखिएको छ । जो जनताको अधिकार कटौति गर्ने अवस्थामा गइरहेको छ ।”

केन्द्र सरकारले मधेसमाथि नाकाबन्दी लगाएको आरोप लगाउँदै उहाँले बजेट, राज्यका निकायमा प्रतिनिधित्व लगायत सबै विषयमा मधेस उपेक्षित बन्दै गएको र नेपालको एउटा उपनिवेशको रुपमा रहेको टिप्पणी गर्नुभयो । उहाँले भन्नुभयो “यहाँ नाकावन्दीको कुरा सुनिन्छ तर मधेसको आर्थिक नाकाबन्दी भइरहेको कहिले कसैले बोलेको छ ? उसको बजेट किन कम ? जनसंख्याको आधारमा किन प्रतिनिधित्व छैन ? यसकारण मधेस खुला जेल बनेको छ । ”

राजपाले लामो समयदेखि गिरिशचन्द्र लाल आयोगको प्रतिवेदन सार्वजनिक गर्नका लागि संसदमा आवाज उठाइरहे पनि सुनुवाई नभएको भन्दै उहाँले त्यसतर्फ गम्भीर बन्न आग्रह गर्नुभयो ।

मलेशियामा रहेका मानिसमाथि पनि मधेस आन्दोलनको मुद्धा चलाइएको भन्दै उहाँले प्रतिवेदन सार्वजनिक गरी वास्तविक दोषीमाथि कारवाहीको माग गर्नुभयो ।  गरिनुपर्नेमा जोड दिनुभयो ।

राष्ट्रिय जनता पार्टी नेपाल मधेस आन्दोलन