भक्तपुर । राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा आज सार्वजनिक नहुने स्पष्ट पारेको छ । राष्ट्रिय परीक्षा बोर्ड अध्यक्ष चन्द्रमणि पौडेले आज नतिजा सार्वजनिक नहुने बताउनुभयो । अहिले अन्तिम रुजु गर्ने र क्रस चेकिङको काम भैरहेकाले आज नतिजा सार्वजनिक नहुने परीक्षा नियन्त्रक विष्णुप्रसाद अधिकारीले बताउनुभयो । 

ढिलोमा असार पहिलो हप्ताभित्र एसइईको नतिजा सार्वजनिक हुने गरेको भएपनि यसपटक दोस्रो हप्तामा पुगेको हो ।  यसपटक प्रदेश २ मा प्रश्नपत्र बाहिरिएर पुनः परीक्षा सञ्चालन गर्नुपर्दा र जनशक्ति अभावले नतिजा प्रकाशन गर्न ढिला भएको राष्ट्रिय परीक्षा बोर्डले जनाएको छ ।

 

देशभर एकैसाथ १० चैतदेखि २१ सम्म परीक्षा सञ्चालन भएको थियो । प्रदेश–२ मा भने २२ देखि २९ चैत्रसम्म परीक्षा सञ्चालन गरेको थियो । 

 

यसवर्ष नियमिततर्फ चार लाख ५० हजार एक सय ८६ र विगतको आंशिक गरी जम्मा चार लाख ७५ हजार परीक्षार्थी सहभागी छन् ।