काठमाडौँ ।  शुक्रबारको प्रतिनिधि सभाको बैठकको शुन्य समयामा नेकपा सांसद विशाल भट्राईले भने –‘यसै प्रतिनिधि सभाका माननीय शान्ता चौधरी र नेपालकी स्थापित नायिका करिश्मा मानन्धरले राम्रो अंकसहित एसईईमा उत्तीर्ण हुनुभएकोमा बधाई दिन चाहन्छु,’ उनले यसो भनिरहँदा सांसद्हरुले चौधरीलाई टेबुल ठटाएर बधाई दिए ।

 

सांसदले बधाइ दिएछि सांसद शान्ता चौधरीले पनि संसदबाट धन्यवाद ज्ञापन गरिन् । उनले भनिन् – ‘(एसइई)मा पास हुने सम्पूर्ण विद्यार्थीलाई शुभकामना दिन चाहन्छु, र थोरै नम्बर पाएका विद्यार्थी भाइबहिनी निराश नहुनुस्, मेहनत गरे अवश्य सफल हुनुहुनेछ भन्न चाहन्छु ।’

हुन पनि विहिबार माध्यमिक शिक्षा परीक्षा (एसइई) को नतिजा सार्वजनिक भएसँगै चर्चामा रहे दुई सेलिब्रेटी, नेतृ र अभिनेतृ शान्ता चौधरी र करिश्मा मानन्धर । एसइई उत्तीर्ण भएपछि शान्ता चौधरीलाई प्रधानमन्त्रीदेखि मन्त्री र अन्य राजनीतिक दलका नेताले बधाइ दिएका थिए ।