अज्ञात समूह गर्यो वडा कार्यालयमा आगजनी, सम्पूर्ण सरसामान जलेर नष्ट
डोटी । डोटीको शिखर नगरपालिका-७, बैरकोटस्थित वडा कार्यालयमा गएराति अज्ञात समूहले आगजनी गरेका छन्।
जिल्ला प्रहरी कार्यालय डोटीका प्रहरी प्रमुख तथा प्रहरी उपरीक्षक विद्यानन्द माझीका अनुसार अज्ञात समूहले गएराति करीब १ बजेको समयमा उक्त वडा कार्यालयमा आगजनी गरेको हो। आगजनीबाट वडा कार्यालयमा भएका फर्निचर, काजगात तथा अन्य सरसामान जलेर नष्ट भएको छ।
आगजनी किन, कस्ले गर्यो भन्ने विषयमा अनुसन्धान भइरहेको प्रहरी उपरीक्षक माझीले बताए। उनले भने, 'घटनास्थलमा प्रहरी टोली परिचालन गरिएको छ, किन र कसले आगजनी गर्यो अनुसन्धानपछि मात्रै भन्न सकिन्छ।'
आगजनीबाट उक्त वडा कार्यालयका वडाध्यक्ष तथा वडासचिवको कोठामा भएका सम्पूर्ण सामान जलेर नष्ट भएको वडाध्यक्ष नरबहादुर बलायरले बताए। विप्लव समूहका कार्यकर्ताले आगजनी गरेको हुनसक्ने डोटी प्रहरीको अनुमान छ।
जिल्लामा उक्त वडा कार्यालयसहित अज्ञात समूहले बडीकेदार, जोरायल गरी तीन स्थानीय तहका वडा कार्यालयमा आगजनी गरिसकेको छ।
आगलागी
