रोल्पा । अविरल बर्षाका कारण गएरात रोल्पाको थवाङ गाउँपालिका–२ छेर्लाबाङमा गएको पहिरोमा परी ६ जना पुरिएका छन् । रोल्पा प्रहरी प्रमुख चित्रबहादुर गुरुङले घटनाको पुष्टि गर्दै २ जनाको शव निकालिएको र अन्यको खोजी भइरहेको बताए ।

स्थानीयको सहयोगमा २८ वर्षीया सिरकुमारी झाँक्री बुढा र उनका ४ वर्षीय छोरा असल बुढाको शव निकालिएको छ । घटनामा अन्य ४ जनाको खोजी भैरहेको प्रहरीले जनाएको छ । गएरात १२ बजे तिर गएको पहिरोमा परी घरमा सुतेका स्थानीय जयबहादुर बुढाको परिवार समेत त्यहि घटनामा परेको स्थानीयले बताएका छन ।

मिरुल, कुरेली र थबाङबाट गएको प्रहरी र स्थानीयहरुले पहिरोले पुरेको घरमा खोजी गरिरहेको प्रहरीले बताएको छ । घर माथि रहेको शहीदमार्ग सडक भासिएर पहिरो जाँदा घटना भएको हो ।