काठमाडौँ । बुटवल–पाल्पा सडकखण्डमा पहिरोले दुई वटा सवारी साधन पुरिँदा एक जनाको मृत्यु भएको छ भने चार जना घाइते भएका छन् । सिद्धबाबाको दोभान नजिकै गएको पहिरोमा पुरिएर लु १ ज २६१७ नम्बरको जिप र लु १ ज ५१३८ नम्बरको स्कारपियो पुरिएको हो ।

मृत्यु हुनेमा जिपका चालक कमल परियार छन् । उनको घटनास्थलमै मृत्यु भएको हो । घाइतेमध्ये दुई जनाको अवस्था गम्भीर रहेको बताइएको छ ।

उनीहरुको लुम्बिनी प्रादेशिक अस्पताल बुटवलमा उपचार भईरहेको छ । प्रहरीका अनुसार जिप बुटवलबाट गुल्मी जाँदै थियो भने स्कारपियो पाल्पाबाट बुटवल आउँदै थियो ।

प्रहरीले घटनास्थलमा उद्धार गरिरहेको छ । पहिरोका कारण बुटवल पाल्पा सडक खण्ड अवरुद्ध भएको छ ।