काठमाडौँ । प्रमुख प्रतिपक्ष दल नेपाली काँग्रेसले पार्टीका बाँके जिल्ला सभापति किरण कोइरालासहितका नेता तथा कार्यकर्तामाथि सांघातिक हमला गर्नेमाथि कडा कारवाही गर्न सरकारसँग माग गर्दै काठमाडौँमा प्रर्दशन गरेको छ ।

नेपाली काँग्रेस, जिल्ला कार्य समिति काठमाडौंको आह्वानमा पार्टीका बाँके जिल्ला सभापतिमाथि सत्तारुढ नेकपाकै संलग्नतामा आक्रमण भएको दाबी गर्दै दोषीलाई पक्राउ गरी कडा कारवाहीको माग गर्दै शनिबार दिउँसो माईतीघर मण्डलामा विरोध प्रदर्शन गरिएको हो ।

विगतमा हत्या, हिंसा र आतंकमा संलग्न रहेका सत्तारुढ नेकपाका नेता, कार्यकर्ताले बाँकेको सितापुरमा एक कार्यक्रममा सहभागी भएकी कांग्रेस जिल्ला सभापति कोइरालासहित एक दर्जन बढीलाई आक्रमण गरी घाइते बनाएपछि त्यसको विरोधमा काठमाडौंसहित देशभर शान्तिपूर्ण विरोध प्रर्दशन गर्नु परेको काँग्रेस, काठमाडौंका जिल्ला सभापति सबुज बानियाले जानकारी दिए ।

उनले उक्त घटनामा संलग्न कार्यकर्तालाई सरकारले कारवाही नगरे आफूहरुले पानीमूनी पुगे पनि नछाडने चेतावनी दिए ।

करिब १५ मिनेट शान्तिपूर्ण धर्नामा रहेका काँगे्रेस नेता, कार्यकर्ताहरुले ‘प्रधानमन्त्री ज्यू, भनी प्रश्न गरिएको प्ले कार्ड पनि प्रर्दशन गरेका थिए । उनीहरुले नागरिकलाई शान्ति सुरक्षा दिन पूर्णत असफल भएको दावी गर्दै सरकारबिरुद्ध चर्का नाराबाजी गरेका थिए ।

गत बुधबार बाँकेको सितापुरमा पार्टीका राष्ट्रिय जागरण अभियानको कार्यक्रममा सहभागी भएकाहरुमाथि आक्रमण हुँदा बाँके जिल्ला सभापति कोइराला, महाधिवेशन प्रतिनिधि विद्याप्रसाद खनालसहित एक दर्जन बढी नेता, कार्यकर्ता घाईते भएका थिए । घटनामा सत्तारुढ दलकै संलग्नता रहेको दाबी गर्दै नेपाली काँग्रेसले दोषीमाथि कडा कारवाही गर्न सरकारसँग माग गर्दै देशभर विरोध प्रर्दशन सुरु गरेको हो ।