कावासोती : नवलपरासीको कावासोती नगरपालिका–८, खरकट्टामा दुर्घटनामा परी मृत्यु हुने पाँचैजनाको सनाखत भएको छ ।

सोमबार राति १०:१५ बजेको समयमा पूर्वी नवलपरासीको कावासोती नगरपालिका-८, खरकट्टा जंगलस्थित पूर्व-पश्चिम राजमार्गमा लु१ख ८५३२ नंको ट्रक र बा २१ च ६४०९ नंको कार आपसमा ठोक्किँदा कारमा सवार पाँचजनाको मृत्यु भएको हो।   

मृत्यु हुनेमा देवचुली नगरपालिका–१ केउरेनीका दीपक भन्ने पूर्णबहादुर विक, देवचुली–५ का दिलबहादुर ढेँगामगर, देवचुली नगरपालिका–१० का दिपेश राना, सोही स्थान घर भएका हीरा राना र कैलाली धनगढी–११ का सुरज रानामगर रहेको जिल्ला प्रहरी कार्यालय नवलपरासी पूर्वका प्रहरी निरीक्षक राजेन्द्र अधिकारीले बताए।

नवलपरासीकै मध्यबिन्दु नगरपालिका–१० मा सोमबार राति नै दाङबाट काठमाडौँका लागि छुटेको ना७ख ८६४२ बस दुर्घटना हुँदा एकजनाको मृत्यु भएको थियो भने १५ जना घाइते भएका छन्।

यस्तै, मंगलबार बिहान ४:४० को समयमा नवलपरासीको चोरमारामा ना ४ ख ९५ १० नम्बरको बस आफैँ अनियन्त्रित भएर पल्टिँदा सातजना घाइते भएका छन्।