रोल्पा - पूर्वी रोल्पामा  यात्रुबाहक खोलामा खस्दा २ जनाको घटनास्थलमै मृत्यु भएको छ। सुनिलस्मृति गाउँपालिका ३ रुईनिबाङमा उक्त यात्रुबाहक बस सडकबाट करिब दुई सय मिटर तल लुङग्री खोलामा खसेको हो।

लुङग्री ३ जुतुङखोला घर भएका २५ वर्षीय चालक  यामबहादुर घर्ती मगर र लुङग्री २ सिर्पका १८ वर्षीय सुर्यलाल जिएमको ज्यान गएको जिल्ला प्रहरी कार्यालय पूर्वी रोल्पाले जनाएको छ।

सोमबार दिउँसो रोल्पाको सिर्प जाने तयारीका लागि ग १ ख ५५३७ आर्शिवाद यातायात प्रालिको उक्त गाडी बसपार्कमा लैजानका लागि फर्काउन जाँदै गर्दा दुर्घटनाग्रस्त भएको प्रहरीले बताएको छ।

गाडी खोलामा खसेपछि स्थानीय र प्रहरीको सहयोगमा शव बाहिर निकालिएको थियो। खोलामा पानीको बहाब उच्च रहेका कारण समाचार तयार पार्दासम्म शवलाई बसको छतमा राखिएको छ।