वीरगञ्ज : प्रहरीलाई हतियार देखाइ भाग्न खोज्नेलाई गोली हानी पक्राउ गरेको छ। वडा प्रहरी कार्यालय श्रीपुरको टोलीले नियमित चेकजाँच क्रममा प्रहरीलाई नै हतियार देखाई भाग्नेलाई प्रहरीले गोली प्रहार गरी पक्राउ गरेको हो।

मंगलबार राति वीरगञ्ज महानगरपालिका १६ बस्ने सन्तोष दासले प्रहरीले पक्राउ गरेको हो। चेकजाँचका लागि खटिएको प्रहरीले दासको दायाँ खुटामा गोली प्रहार गरी नियन्त्रणमा लिएको हो।

उनको साथ १७ राउण्ड गोली र हतियार पनि बरामद भएको छ। घाइते दासको वीरगञ्ज नारायणी अस्पतालमा उपचार भइरहेको पर्साका प्रहरी प्रवक्ता अनन्तराज शर्माले जानकारी दिए। 

उनका अनुसार दास यसअघि पनि कर्तव्य ज्यान मुद्दामा ९ वर्ष जेल बसेर छुटेका व्यक्ति हुन्। उनी भारतमा बस्दै वीरगन्जमा उद्योगी व्यवसायीलाई धम्क्याउँदै रकम असुल्ने गर्थे। उनी सुपारी लिएर व्यक्ति हत्या गर्न वीरगन्ज आएको समयमा प्रहरीको फन्दामा परेका हुन्।