चितवन– भरतपुर महानगरपालिका–१, रामनगरमा आज बिहान भएको दुर्घटनामा परी घाइतेमध्ये दुई जनाको मृत्यु भएको छ । अन्य २१ जनाको भरतपुरका विभिन्न अस्पतालमा उपचार भइरहेको छ । जिल्ला प्रहरी कार्यालय चितवनका अनुसार मृतकको सनाखत हुन सकेको छैन ।

मृतकमध्ये एक महिला र एक पुरुष रहेकाे चितवन प्रहरीले जनाएकाे छ ।उनीहरूको भरतपुर अस्पतालमा उपचारका क्रममा मृत्यु भएको हो । अन्य घाइतेमध्ये १३ चिनियाँ पर्यटकको चितवन मेडिकल कलेज र आठको पुरानो मेडिकल कलेजमा उपचार भइरहेको छ ।

अन्य १० घाइते सामान्य उपचारपछि फर्किएका छन् । गुडिरहेको ट्रकमा पछाडिबाट आउँदै गरेको पर्यटक बस ठक्कर खाँदा ३३ जना घाइते भएका थिए । नारायणगढतर्फ आउँदै गरेको लु२ख ३३०५ नम्बरको ट्रकमा पछाडिबाट आउँदै गरेको बा१प ७८३ नम्बरको पर्यटक बस बिहान ११ः१५ बजे एकआपसमा ठक्कर खाएका थिए ।