काठमाडाैं - प्रतिनिधि सभाको सभामुख चयनका लागि यही माघ १२ गते निर्वाचन हुने भएको छ । ज्येष्ठ सदस्य महन्थ ठाकुरको अध्यक्षतामा सोमवार बसेको दोस्रो बैठकमा यस्तो जानकारी गराइएको हो ।

जेष्ठ सदस्य ठाकुरले प्रतिनिधि सभा नियमावलीबमोजिम सभामुख निर्वाचनसम्बन्धी सूचना आजै प्रकाशित गर्न संसद् सचिवालयका महासचिव मनोहरप्रसाद भट्टरालाई निर्देशन समेत दिए ।

'मान्य सदस्यहरू, प्रतिनिधि सभा नियमावलीको नियम ७ बमोजिम सभामुख पदको निर्वाचनका लागि माघ १२ गते आइतवारको दिन तोकेको छु । उक्त नियमावलीबमोजिम सभामुख निर्वाचनसम्बन्धी सूचना आजै प्रकाशित गर्न संसद् सचिवालयका महासचिव मनोहरप्रसाद भट्टराईलाई निर्देशन पनि दिन्छु,' ठाकुरले भने ।

त्यसअघि ठाकुरले उपसभामुख शिवमाया तुम्बाहाङ्फेले उपसभामुख पदबाट दिएको राजीनामा पढेर सुनाएका थिए ।प्रतिनिधि सभाको अर्को बैठक माघ १२ गते दिउँसो ३ बजे बस्ने गरी बोलाइएको छ ।