काठमाडौं । धादिङमा ट्रक दुर्घटना हुँदा ६ जनाको मृत्यु भएकाे छ भने ५ जना गम्भीर घाइते भएका छन्। निलकण्ठ नगरपालिका-८ मा मिनी ट्रक दुर्घटना भएको जिल्ला प्रहरी कार्यालय प्रहरी धादिङले जनाएकाे छ।  धादिङको ज्वालामुखी गाउँपालिका-४ मा रहेको ढोला मण्डलीमाईको दर्शन गरेर फर्किएका दर्शनार्थी चढेको ग१ख ८०१२ नम्बरको मिनी ट्रक दुर्घटना भएको हो ।

धादिङका प्रहरी उपरीक्षक (एसपी) रवीन्द्र रेग्मीले दुर्घटनामा परी ६ जनाको ज्यान गएकाे पुष्टि गरे। उनका अनुसार मृतकको सनाखत भएको छैन । दुर्घटनामा घाइते १५ जना मध्ये ५ जना गम्भीर घाइते छन् ।

गम्भीर घाइतेलाई उपचारका लागि काठमाडौं पठाउन लागिएको एसपी रेग्मीले बताए । अन्य घाइतेको जिल्ला अस्पताल धादिङमै उपचार भइरहेको प्रहरीले जनाएको छ । मिनी ट्रकमा ढोला मण्डलीमाईको दर्शन गर्न गएका निलकण्ठ नगरपालिका-२ भुलभुलेका बासिन्दा चढेको प्रहरीले बताएको छ ।