काठमाडौंः अष्ट्रेलियामा जारी बिग बास लिग (बीबीएल) मा सिड्नी थन्डरले सन्दीप लामिछाने सम्मिलित मेलबर्न स्टार्सलाई १ सय ४३ रनको लक्ष्य दिएको छ । टस जितेर पहिला ब्याटिङ गरेको सिड्नीले निर्धारित २० ओभरमा ७ विकेट गुमाएर १ सय ४३ रन बनायो ।

उसका लागि एलेक्स रसले ४०, म्याथ्यू गिलक्सले २८, कप्तान कलुम फर्ग्युसनले १९, डानियल साम्सले १३ र अर्जुन नायरले अविजित १७ रन बनाए । अन्य खेलाडीले भने दोहोरो अंकमासमेत रन जोड्न सकेनन् ।

बलिङमा मेलबर्नका हरिश रौफ र कप्तान ग्लेन म्याक्सवेलले घातक बलिङ गरे । सन्दीपको स्थानमा प्लइङ ११ मा समावेश गरिएका फास्ट बलर हरिश रौफले ४ ओभरमा २४ रन दिएर ३ विकेट लिए । यस्तै कप्तान म्याक्सवेलले ३ ओभरमा १७ रन दिएर महत्वपूर्ण २ विकेट लिए । यस्तै क्लिन्ट हिन्चलिफ र एडम जम्पाको नाममा एक–एक विकेट रह्यो ।
 
सुरुवातका ४ खेलमा मौका पाएका सन्दीपले पाँचौ म्याच भने गुमाएका छन् । चोटका कारण सन्दीपले सिड्नी विरुद्धको म्याच गुमाएका हुन् ।  जारी सिजिनमा सन्दीपआवद्ध मेलबर्नले ४ म्याच खेल्दा एकमा हार र ३ खेलमा जित हासिल गरेको छ । यता सिड्नीले ५ म्याच खेल्दा ३ मा जित र एक खेलमा मात्र हार बेहोरेको छ । सिडनी अंक तालिकाको शीर्ष स्थानमा छ । सन्दीपआवद्ध मेलर्न तालिकाको तेस्रो स्थानमा छ ।  

सिड्नीविरुद्ध मेलबर्नको प्लेइङ–११ः मार्कस स्टोइनिस, पीटर ह्यान्सकम्ब, निक लार्किन, ग्लेन म्याक्सवेल (कप्तान)  बेन डन्क, निक म्याडिन्सन, नाथन कल्टर–नाइल, क्लिन्ट हिन्चलिफ, हरिश रौफ, डेल स्टेन र एडम जम्पा । 

बिग बास लिग बीबीएल सिड्नी थन्डरविरुद्ध मेलबर्न स्टार्स सन्दीप लामिछाने हरिश रौफ