विरामी हुनुहुन्छ भन्दैमा प्रधानमन्त्री केपी ओलीले सबै कुराको ‘हो’ मा ‘हो’ मिलाउनुहुन्छ  भन्ने मात्र हैन, अनुमानभन्दा ठीक उल्टो, गत क्याबिनेट बैठकभरि उहाँ आक्रोशित मुद्रामा पेश हुनुभयो । मन्त्रीहरु छक्क परे । मिर्गौलाको नियमित डायलोसिसपछि अघिल्लो सोमबार बसेको अहिलेसम्मकै सबभन्दा लामो क्याविनेट बैठकमा प्रधानमन्त्री आफ्ना मन्त्रीहरुप्रति अत्यन्तै आक्रोशित र असन्तुष्ट देखिनुभएको थियो । 

उहाँले हालै सम्पन्न मन्त्रिपरिषद् पुनर्गठनमा केहीलाई निरन्तरता दिएर तीन महिनाको ग्रेसमार्क दिइएको बताउँदै विदा हुन मन भए मार्गप्रशस्त रहेको बताउनुभयो । उहाँको भनाइ थियो– ‘सरकारको कार्यकाल दुई वर्ष पुग्न लागेको बेला मिडियाले थुप्रै कुरा लेखेका छन् । कतिपय सन्दर्भ आलोचनात्मक, आक्रोशपूर्ण र अतिरञ्जित हुनसक्छन । तर, केही प्रसंग मिलेका पनि छन्  । मन्त्रीहरुको कार्यशैली, कार्यसम्पादन, प्रस्तुति चित्त नबुझ्दो भएको कुरामा म पनि सहमत छु ।’

कार्यशैलीमाथि टिप्पणी गर्दै प्रमले केही उदाहरण पेश गर्नुभयो । वर्षाको बेला तराईमा बाढी आउने, त्यसले कटान गर्ने, बस्ती डुबाउने प्रसंग निकाल्दै भन्नुभयो– ‘यो सबैलाई जानकारी भएको कुरा हो । त्यसलाई ध्यानमा राख्दै अहिले देखि नै किन उपाय नखोज्ने ? जब वर्षा आउन लाग्छ, तब नदीका दायाँबायाँ बालुवाका बोरा लगेर छोपछाप पार्ने र बजेट सक्ने प्रवृत्ति छ ।’ उहाँले प्रधानमन्त्री रोजगार कोषमा पर्याप्त रकम भएको भन्दै ‘पैसाको चिन्ता छैन, जनतालाई प्रत्यक्ष राहत पुग्ने काममा त्यसलाई सदुपयोग गर्न सकिने तर्फ सबैको ध्यानाकर्षण होस् । अहिले देखि नै बाँस ठड्याएर, रुख रोपेर बाढीको खतरा न्यूनिकरण गर्न सकिने ठाउँ छ तर, मन्त्रीहरुको ध्यान पुग्दैन । कर्मचारीलाई काम लगाउन सकिएको छैन । अब यस्ता कुरा सह्य हुँदैनन ।’ बैठकमा तीतो पोख्नुभयो । 

उहाँले कड्किएर भन्नुभयो– ‘प्रत्येक मन्त्रीसंग कार्यसम्पादन सम्झौता गरिएको छ । अब मलाई देखिने गरी परिणाम चाहिन्छ । मन्त्री हुने अनि एमसीसीजस्तो परियोजनाको विरोध पनि गर्ने ? यो कुरा सह्य हुँदैन । एमसीसीबारे सरकारको धारणा सार्वजनिक गर्न मन्त्रिपरिषद् कार्यालय या परराष्ट्रको आयोजनामा पत्रकार सम्मेलन गर्ने कुरा थियो । तर, कृषिमन्त्री घनश्याम भुसालले ‘पहिला संसदीय दलमा छलफल गरौं, आफूभित्र एकमत कायम गरेपछि पत्रकार सम्मेलन पनि गर्नुपर्ला’ भन्ने कुरा उठाए ।

उनले भने– ‘हाम्रो संसदीय दलभित्रै यसबारे प्रष्ट धारणा राख्ने र त्यहीअनुसार जाने भनिएपछि यसबीच जति पनि विरोध र विवादका स्वर आएका छन, तिनलाई मत्थर पार्न सांसद, मन्त्री सक्रिय हुन्छन । त्यसपछि व्यक्तिलाई दपेट्ने कुरै भएन ।’ तर प्रमले ‘एमसीसी पास हुन्छ, जसरी पनि गर्नैपछर्’ भन्दै कुराको बिट मार्नुभयो । जनआस्था 

प्रधानमन्त्री एमसीसी