सुनसरी – सुनसरीमा भरुवा बन्दुकसहित ४ जना पक्राउ परेका छन्।  पक्राउ पर्नेमा पानवारीका ३० वर्षीय मणि तामाङ, २६ वर्षीय सिद्धार्थ राई, ३९ वर्षीय रामबहादुर योन्जन र ३० वर्षीय शम्भु दाहाल रहेका छन्। धरानबाट २ नाल भरुवा बन्दुकसहित उनीहरुलाई प्रहरीले पक्राउ गरेको हो। 

विशेष सूचनाको आधारमा धरान उप–महानगरपालिका–६ बाट २ नाल भरुवा बन्दुक र मृत बँदेलसहित उनीहरुलाई प्रहरीले शुक्रबार बिहान नियन्त्रणमा लिएको हो ।

प्रहरी चौकी पानवारीबाट गस्तीमा खटिएको प्रहरी टोलीले जंगलबाट निस्किरहेको अवस्थामा उनीहरुलाई पक्राउ गरेको हो।  प्रहरीले उनीहरूले प्रयोग गरेको २० प ८७१६ र ना १४ प ६४३३ नम्बरका मोटरसाइकलसमेत नियन्त्रणमा लिएको छ । पक्राउ परेका चारै जनाको विषयमा थप अनुसन्धान भइरहेको इलाका प्रहरी कार्यालय धरानले जनाएको छ ।