काठमाडौंः आज पनि देशका विभिन्न ठाउँमा पानी र हिउँ पर्ने सम्भावना रहेको मौसमविद्ले जानकारी दिएका छन् । मौसमविद् विभुति पोख्रेलका अनुसार विशेष गरी आज मध्य र पूर्वका उच्च पहाडी तथा हिमाली भेगमा हिउँ र अन्य ठाउँमा पानी पर्ने सम्भावना रहेको छ ।

पश्चिमी वायुको प्रभाव आज यी ठाउँमा धेरै पर्ने सम्भावना रहेको उनको भनाई छ । पश्चिमी वायुको प्रभाव शुक्रबार पश्चिमी क्षेत्रमा भने कम हुने मौसमविद्ले बताएका छन् । आज दिउँसो काठमाडौंसहित देशका पूर्वी र मध्य क्षेत्रमा सामान्य पानी पर्ने सम्भावना भए पनि बेलुका चार–पाँच बजेपछि उच्च पहाडी तथा हिमाली क्षेत्रमा भारी हिउँ पर्ने र अरु ठाउँमा हल्कादेखि मध्यम खालको पानी पर्ने सम्भावना रहेको उनले बताए । 

शनिबार आजको तुलनामा पश्चिमी वायुको प्रभाव कम हुने भए पनि उच्च पहाडी तथा हिमाली भूभागमा हल्कादेखि मध्यम हिमपात र पहाडी भेगमा हल्का वर्षाको सम्भावना छ । शुक्रबार बिहान पौने ६ बजेको काठमाडौंको तापक्रम ५ डिग्री सेल्सियस मापन गरिएको छ ।  

आजको मौसम