मुख्यमन्त्री विरुद्ध अविस्वासको प्रस्तावमा हस्ताक्षर गर्ने कर्णाली प्रदेशका केहि नेकपाका सांसद पद पाउने पक्का भएपछि निर्णयवाट पछि हटेका छन् । उनीहरुको निर्णय लगत्तै कर्णाली प्रदेश नेकपा संसदीय दलको सचेतकमा कुर्मराज शाहीलाई नियुक्त गरिएको छ।

संसदिय दलका नेतासमेत रहेका मुख्यमन्त्री महेन्द्रवहादुर शाहीले मंगलबार उक्त पदमा कुर्मराजलाई नियुक्त गरेका हुन् । सचेतकमा नियुक्त भएका शाही अविश्वास प्रस्तावको पक्षमा हस्ताक्षर गर्ने मध्येका एक हुन् । उनी वरिष्ठ नेता माधवकुमार नेपाल पक्षीय सांसद हुन् ।

मुख्यमन्त्री शाहीले आइतबारमात्र प्रमुख सचेतक रहेका यमलाल कँडेल पक्षका गुलाबजंग शाहीलाई पदमुक्त गरी उक्त स्थानमा सीता नेपालीलाई जिम्मेवारी दिएका थिए । नेपाली यसअघि सचेतक थिइन् ।

अविस्वासको प्रस्ताव असफल वनाउँन प्रचण्ड र नेपाल समुह एक भएपछि यो अवस्था आएको एक नेताले वताए । मुख्यमन्त्री शाहीलले नेपाल समूहलाई तीन मन्त्री र संसदीय दलको सचेतक दिने सहमति गरेका थिए।

शाहीलाई सत्तारुढ नेपाल कम्युनिस्ट पार्टी (नेकपा) को संसदीय दलका नेताबाट हटाउन यमलाल कँडेलसहितका १८ सांसदले संसदीय दलमा अविश्वासको प्रस्ताव दर्ता गरेका थिए । अविश्वासको प्रस्तावमा हस्ताक्षर गर्नेमध्येका १८ जनामध्ये ७ जना नेपाल पक्षका, ८ जना अध्यक्ष केपी ओली पक्षका र ३ जना अध्यक्ष पुष्पकमल दाहाल पक्षका छन् । 

कार्यकारी अध्यक्ष पुष्पकमल दाहाल प्रचण्ड र बरिष्ठ नेता माधवकुमार नेपाल समूह त्यसलाई रोक्न सहमत भए । एक नेताका अनुसार नेपाल समूहका नेता समावेश गरी मन्त्रिपरिषद् पनि मंगलबार नै पुनर्गठन गर्ने सहमति भएको छ ।
नेपाल समूहले मन्त्रीका लागि चन्द्र शाही, करवीर शाही र अम्मरबहादुर थापाको नाम बुझाएको छ । मन्त्रिपरिषद् पुनर्गठन गर्दा मुख्यमन्त्री शाहीले पूर्वमाओवादी समूहबाट समेत मन्त्री थप्ने तयारी गरेका छन् ।