काठमाडौं महानगरपालिका–१६, स्थित नयाँ बजारको फलफूल चोकको एउटा घरमा ग्यास सिलिण्डर बिस्फोट भएको छ । विस्फोटमा ११ जना घाइते भएका छन् । घाईते मध्ये गम्भीर चार जनालाई मनमोहन अस्पताल लगिएको छ ।

किरियापुत्री बसेको निलकुमारी क्षेत्रको घरमा बिस्फोट भएको हो । कोठामा ग्यास बाल्ने क्रममा विस्फोट भएको जनाईएको छ । सुरुमा भुइँ तलाको भर्याङ छेउमा ग्यास बाल्ने क्रममा लिक भएर आगलागी भएको थियो । त्यहाँ अर्को सिलिण्डर पनि थियो र विस्फोट हुँदा ठूलो क्षति भएको हो ।

विस्फोटले झ्यालका सीसा फुट्नुका साथै भित्ता नै भत्किएकाले धेरैलाई चोट लागेको बताइएको छ ।

विस्फोटबाट ठूलो क्षति भएकाले महानगरीय प्रहरी परिषद, काठमाडौंका प्रमुख एसएसपी श्याम ज्ञवाली आफैं घटनास्थलमा पुगेको प्रहरीले जनाएको छ ।