कैलालीको धनगढिमा एक जना असई र प्रहरी जवान विगत १२ घण्टादेखि वेपत्ता भएका छन्। धनगढी नजिकैको जुगेडास्थित अस्थायी प्रहरी चौकीमा कार्यरत असई गोविन्द विक र प्रहरी जवान रामबहादुर साउद शनिबार राति १० बजेदेखि बेपत्ता भएका हुन् ।

नेपाल–भारत सिमा क्षेत्रमा रहेको मोहना नदि क्षेत्रमा गस्तिका लागि मोटरसाइकल लिएर निस्केका दुवै जना आईतवार विहानसम्म पनि फर्केका छैनन्। लामो समयसम्म पनि नफर्केपछि उनीहरुको खोजी सुरु भएको जिल्ला प्रहरी कार्यालयका इन्सपेक्टर दानबहादुर रोकायाले वताए ।

प्रहरीहरु बेपत्ता भएको जानकारी पछि सुदूरपश्चिम प्रदेशका डिआइजी उत्तमराज सुवेदी घटनास्थलमा पुगेका छन् भने जिल्ला प्रहरी कार्यालयबाट प्रहरी अधिकृतसहितको टोली खोजतलासमा परिचालित भएको छ।

जिल्ला प्रहरी कार्यालयका अनुसार मोहना नदीमा एक जना अपरिचित ब्यक्तिको शव फेला परेको छ । तर, पहिचान हुन नसकेका कारण थप आशंकाहरु उत्पन्न भईरहेको रोकायले वताए ।

प्रहरीले तस्करसँग उनीहरुको भिडन्त भएको हुनसक्ने अनुमान गरेको छ। तर, हालसम्म भिडन्तका कुनै संकेत देखिएका छैनन्। घटनाको विस्तृत विवरण आउन बाँकी नै रहेको जिल्ला प्रहरी कार्यालय कैलालीले जनाएको छ ।