पुर्व मन्त्री एवम् नेकपाका सांसद गोकर्ण विष्टले दसैँ भत्ता वापत सरकारले आफनो खातामा जम्मा गरेको रकम फिर्ता गरेका छन् । उनले दशैं भत्ता वापत खातामा जम्मा भएको रकम वरावरको बराबरको चेक काटेर पत्रसहित संसद सचिवालयमा दर्ता गराएका छन् ।

कोरोनाका कारण देशले चरम संकटको सामना गरिरहेको र लाखौं श्रमिकले पूर्ण वा आंशिक रुपमा रोजगारी गुमाएको अवस्था रहेको वताउँदै सांसद विष्टले संसद सचिवालयका महासचिव सम्वोधन गरेका पत्र पठाएका छन् । 

‘अति विपन्न व्यक्तिहरूले चउरमा थाल थापेर छाक टार्ने अवस्था देखा परेको छ । कोरोना र अन्य रोगका विरामीहरूले उपचारको लागि अस्पतालको शैया समेत नपाउने अवस्था उत्पन्न भएको छ’ उनको पत्रमा भनिएको छ–‘यसरी आम नागरिकले रोग र भोकसंग जुधिरहेको यो संकटपूर्ण घडीमा अनावश्यक खर्च र कतिपय सुविधा समेत कटौती गरेर जनताको उपचारमा केन्द्रित हुनुपर्ने अवस्था देखा परेको छ।’

आम नागरिकले चरम पीडा भोगिरहेको र देशमा गम्भीर संकट थपिँदै गएको अबस्थामा सांसदको हैसियतमा दशैं खर्चको नाममा सुविधा लिने कुरा सामाजिक न्यायको हिसाबले पनि उपयुक्त नदेखिने उनले वताएका छन् ।