निर्मला पन्तको हत्या अनुसन्धानमा कञ्चनपुरमा रहेको केन्द्रीय अनुसन्धान ब्युरो (सीआईबी) को टोलीलाई कैलालीको जुगेडाका इन्चार्ज (असई) गोविन्द विकको हत्या अनुसन्धानमा खटाईएको छ ।

सीआईबीका एकजना डीएसपीको नेतृत्वमा टोली परिचालन भएको हो । कैलालीको धनगढी उपमहानगरपालिका १२ को अस्थायी प्रहरी बिट जुगेडाका इन्चार्ज (असई) गोविन्द विक शनिबार साँझ मोटरसाइकलमा गस्तीमा गएका थिए । उनको आइतबार बिहान मोहना नदीमा शव फेला परेका थिए ।

उनको घाँटिमा धारीलो हतियारले रेटेको घाउ रहेको प्रहरीले जनाएको छ। तस्करसँगको भिडन्तमा उनको हत्या भएको प्रहरीले दावी गरिरहेको छ । उनको हत्या आशंकाम ११ जनालाई पक्राउ गरिएको छ। तर, नाम सार्वजनिक गरिएको छैन।

कहाँ गए प्रहारी जवान साउद ?

उनीसँगै गस्तिमा गएका प्रहरी जवान रामबहादुर साउद भने अझैसम्म भेटिएका छैनन् । उनको खोजी जारी छ । नेपाल प्रहरी र सशस्त्र प्रहरी वलको गोताखोर परिचालन गरेर मोहना नदिमा खोजतालस गर्दा समेत उनको वारेमा कुनै जानकारी हात लागेको छैन । घटनाको अनुसन्धानका लागि सुदूरपश्चिम प्रदेश प्रहरी कार्यालय र जिल्ला प्रहरी कार्यालय कैलालीको टोली पनि परिचालित छ।