प्रधानमन्त्री केपी शर्मा ओलीले कोरोनाको उपचार खर्च ब्यहोर्न नसक्ने स्वघोषणा गरे त्यस्ता ब्यक्तिको उपचार सरकारले गर्ने वताएका छन् ।

वडा दशैंका अवसरमा देशवासीका नाममा सम्बोधन गर्ने क्रममा प्रधानमन्त्री ओलीले संक्रमितका परिवार र अस्पतालले पनि उपचार खर्च नब्यहोरेको खण्डमा कोरोना संक्रमितको उपचार सरकारले गर्ने बताए। 

विपत्तिका समयमा जनताको जीउधनको रक्षा गर्नु सरकारको निशर्तः दायित्व भएको वताएका ओलीले कोरोना भाइरसको परीक्षण र उपचारको यथोचित प्रबन्ध सरकारले गर्ने बताए । परिक्षण र उपचार मात्र नभई खोपको व्यवस्था गर्न पनि सरकार लाग्ने उनको भनाइ थियो ।

पछिल्लो समय सरकारले कोरोना संक्रमितको उपचार नगर्ने निर्णयलाई लिएर भएको आलोचनाप्रति संकेत गर्दै उनले भने–‘संक्रमितका परिवार र अस्पतालले उपचार गर्न नसक्ने भएमा त्यस्ता ब्यक्तिको उपचार सरकारले गर्छ ।’

स्वास्थ्य मन्त्रालयका प्रवक्ता डा. जागेश्वर गौतमले गत कात्तिक २ गतेको नियमित पत्रकार सम्मेलनमा कोरोनाका विरामीको उपचार अबदेखि सरकारले नगर्ने बताएका थिए ।

प्रधानमन्त्री ओलीले कोरोना संक्रमणका कारण विगतभन्दा यस पटक दशैं फरक तरिकाले मनाउनु परेको बताए । मान्यजनहरुसँग टीका जमरा ग्रहण गर्ने क्रममा अनावश्यक नजिकिँदा हुनसक्ने सम्भावित संक्रमणको खतरा ख्याल गर्न उनले आग्रह गरे ।

दसैँ मान्दा निकै होशियार भएर र सामाजिक दूरी कायम गरेर मान्न पनि उनले आग्रह गरे।