उत्तरी सिरियाको इदलिब प्रान्तमा रुसी हवाई हमलामा ५० भन्दा बढी टर्की समर्थित लडाकुको मृत्यु भएको छ । 

इदलिब शहरको उत्तरपश्चिममा अवस्थित हारेम भन्ने स्थानमा हवाई हमला भएपछि सो क्षेत्रमा हिंसा बढेको छ । फायलाक–अल–शाम नामक संगठनको प्रशिक्षण केन्द्रमा आक्रमण भएको हो ।

यो आक्रमणपछि इदलिबमा रुस र टर्कीको मध्यस्थतामा भएको युद्ध विराम खतरामा परेको जनाईएको छ। सिरियामा जारी गृहयुद्धमा रुस र टर्कीले विरोधी पक्षलाई समर्थन गरेका छन् ।

ब्रिटेनस्थित संगठन सिरियन अब्जरभेटरी फर ह्युमन राइट्सका अनुसार मृत्यु हुनेको संख्या ७८ सम्म पुगेको अनुमान छ । संगठनका अनुसार धेरै घाइतेहरुको अवस्था चिन्ताजनक छ ।

संगठनका अनुसार गत मार्च महिनामा युद्धविराम भएपछिको यो सबैभन्दा ठूलो आक्रमण हो ।

हिंसाका कारण त्यहाँबाट १० लाख मानिस बिस्थापित भएका छन् । युद्धविराम भएपछि भने मानिसहरु पलायन हुने क्रम रोकिएको थियो ।

सिरियामा नौ वर्षदेखि गृहयुद्ध चलिरहेको छ । सिरियाको सरकार विरोधी र जेहादिहरुको कब्जामा रहेको इदलिब अन्तिम प्रान्त हो । राष्ट्रपति बसर अल असादको समर्थन गर्ने सुरक्षा बलले देशका अन्य क्षेत्रबाट विद्रोहीहरुलाई हटाइसकेका छन् ।

एजेन्सी