जाजरकोटको जुनिचाँदे गाउँपालिकामा जिप दुर्घटना हुँदा जुनिचाँदे–११ का अध्यक्ष अमरबहादुर शाहीसहित पाँच जनाको मृत्यु भएको छ ।

जिल्ला सदरमुखकाम खलंगाबाट जुनिचाँदे जाँदै गरेको भे१ज ९३५ नम्बरको जिप बुधबार जुनिचाँदे–१ स्थित औलखोलामा दुर्घटना भएको थियो । जिप सडकबाट  ५ सय मिटर तल खोलामा खसेको थियो।

दुर्घटनामा ५ जनाको घटनास्थलमै मृत्यु भएको र दुईजना बेपत्ता रहेको जिल्ला प्रहरी कार्यालय जाजरकोटले जनाएको छ ।

मृत्यु हुनेमा वडाध्यक्ष सहित सोही गाउँपालिका–११ का कृतिबहादुर शाही, खेमबहादुर शाही, वडानम्बर ५ का मालिका बस्नेत र कृष्णबहादुर शाही रहेको डीएसपी किशोर श्रेष्ठले जानकारी दिए ।

बेपत्ता भएका दुईजनाको खोजी भइरहेको उनले बताए ।