भारतीय सहयोगमा निर्मित लक्ष्मीनियाँ जनता माविको नयाँ भवन उद्घाटन
भारत सरकारको सहयोगमा निर्मित धनुषाको कुम्हरौडास्थित श्री लक्ष्मीनियाँ जनता माध्यमिक विद्यालयको नयाँ भवन सोमवार उद्घाटन भएको छ ।
काठमाण्डौंस्थित भारतीय राजदूतावास, शहरी विकास तथा भवन निर्माण विभाग, संघीय परियोजना कार्यान्वयन इकाई, धनुषा, विद्यालय व्यवस्थापन समिति र स्थानीय जनप्रतिनिधिहरुले संयुक्त रुपमा भवन उद्घाटन गरेका हुन् ।
‘नेपाल–भारत विकास सहकार्य’ कार्यक्रम अन्तर्गत भारत सरकारको २ करोड ६२ लाख ४० हजारको सहयोगमा १५ कोठाको ३ तले भवन निर्माण गरिएको हो ।
सन् १९५६ मा स्थापना भएको यावे विद्यालयमा हाल करिब ११ सय ७ जना विद्यार्थीहरु अध्ययनरत छन् । नवनिर्मित संरचनाले विद्यार्थीहरुको सिकाई वातावरणलाई सुदृढ गर्ने अपेक्षा गरिएको भारतीय दुतावासले जनाएको छ । यस परियोजनाले नेपाल र भारतबीचको विकास साझेदारीलाई प्रतिबिम्बित गर्नुका साथै शिक्षाको क्षेत्रमा पूर्वाधार अभिवृद्धि गर्न नेपाल सरकारले गरेको प्रयासलाई थप बल पुर्याएको दुतावसको भनाई छ ।
भारत सरकार र नेपाल सरकारबीच भएको सम्झौता अन्तर्गत यस परियोजनालाई उच्च प्रभाव सामुदायिक विकास परियोजनाको रुपमा विकास गरिएको हो । यस्तै, धनुषाको तुलसियाहीमा वैद्यनाथ देवनारायण जनता उच्च माध्यमिक विद्यालयको भवन निर्माणका लागि पनि भारतले सहयोग गरेको दुतावासले जनाएको छ । ०७६ चैत्र ३ गते सम्झौतापत्रमा हस्ताक्षर भएको छ भने टेन्डर प्रक्रिया पुरा गर्न बाँकी रहेको जनाईएको छ ।
भारतले हालसम्म नेपालमा ४ सय २४ उच्च प्रभाव सामुदायिक विकास परियोजनाहरु सम्पन्न गरिसकेको छ । जसमध्ये धनुषामा १० सहित प्रदेश नं २ मा ४५ वटा परियोजना सम्पन्न भएका छन् ।
यसैगरी, धनुषामा ९ सहित प्रदेश नं २ मा भारत सरकारको अनुदानमा सञ्चालित २१ परियोजनाहरु सम्पन्न तथा कार्यान्वयनका विभिन्न चरणहरुमा रहेको दुतावासले जनाएको छ ।
