नेत्रविक्रम चन्द ‘विप्लव’ समुहका कार्यकर्ताले खसि नदिएको आक्रोशमा मिक्लाजुङ गाउँपालिका–१ स्थित सरस्वती आधारभूत विद्यालयका प्रधानाध्यापक राजेन्द्र श्रेष्ठको हत्या गरेको पाईएको छ । 

नेत्रविक्रम चन्द ‘विप्लव’ नेतृत्वको ‘प्रतिवन्धित नेकपा’ का कार्यकर्ताले मंगलवार विहान श्रेष्ठलाई अपहरण गरी बर्खे जंगलमा लगेर हत्या गरेका थिए । हात बाँधेर धारिलो हतियारले घाटी रेटी हत्या गरिएको अवस्थामा उनको शव फेला परेको थियो । 

मोरङको विकट क्षेत्र मानिएको मिक्लाजुङ गाउँपालिकामा विप्लव समूहको गतिविधि बढी हुुँदै आएको छ। सोहि  क्रममा उनीहरुले सोमबार शिक्षक श्रेष्ठलाई खसीको माग गरेका थिए । श्रेष्ठले आफूसँग खसी नभएको र बाख्रा लैजान उनीहरुलाई आग्रह गरेका थिए । ‘हामीलाई खसी नै चाहिन्छ’ भन्दै उनीहरुले अडान राखेपछि श्रेष्ठले मंगलवार दिने वाचा गरेका थिए । स्थानीयले प्रहरी अधिकारीका अनुसार विप्लव समूहका कार्यकर्ताले श्रेष्ठलाई सोमवारै घरबाट लैजाने योजना बनाएका थिए ।

श्रेष्ठले विप्लव समूहले खसी मागेको आफ्ना एकजना छिमेकीलाई वताएको पाइएको छ । मंगलबार बिहानै विप्लव समूहका कार्यकर्ता श्रेष्ठको घरमा आएका थिए । श्रीमतीलाई खसी खोज्न पठाएर घरमा वसेका श्रेष्ठलाई सोहि समयमा उनीहरुले अपहरण गरेको प्रहरीले जनाएको छ । 

विप्लव समुहले भने श्रेष्ठलाई सुराकीको आरोप लगाउँदै सम्झाउन जाँदा हतियार लिएर प्रतिकार गर्दा उनको मृत्यु भएको जनाएको छ ।

प्रदेश नम्बर १ का प्रहरी प्रमुख डीआईजी ईश्वरबाबु कार्की घटनाको अनुसन्धान भइरहेको र सो समूहको खोजी भईरहेको बताउँछन् ।