चिनी मिल सञ्चालकबाट बक्यौता रकम उठाइदिन सरकारले गरेको बाचा पुरा नभएको भन्दै सर्लाहीका उखु किसानले काठमाडौं केन्द्रित आन्दोलन सुरु गरेका छन् । सर्लाहीबाट करिव २५÷३० जना किसान काठमाण्डौ आएका छन्। 

गत वर्ष पुस १६ गते भएको सम्झौता कार्यान्वयन गर्न माग गर्दै उनीहरुले आईतवारदेखि काठमाडौंको माइतीघर मण्डलामा धर्ना दिन थालेका छन् । माईतिघर मण्डलाको आन्दोलनलाई वेवास्ता गरे सिंहदरबार र बालुवाटार घेराउ गर्ने उखु किसानले चेतावनी दिएका छन् ।

सरकारले किसानसँग पटक–पटक वाचा गर्ने तर पुरा नगर्ने गर्दै आएकाले यस पटकको आन्दोलनवाट निकास निकालेर मात्रै फिर्ता हुने उखु किसान संघर्ष समिति सर्लाहीका संरक्षक राकेश मिश्रले वताए ।

यस विषयमा उखु किसानले तिहारअघि उद्योग मन्त्रीलाई भेटेका थिए । मन्त्रीले पैसा दिलाइदिने बाचा गरेका थिए । तर, सम्झौता कार्यान्वयन नभएपछि निर्णायक आन्दोलनका लागि काठमाण्डौं आउनु परेको किसानहरुले बताएका छन् ।

सरकारी तथ्यांकअनुसार चार वटा चिनी मिलबाट उखु किसानले अझै ५२ करोड भन्दा धेरै बक्यौता पाउनु पर्नेछ । श्रीराम सुगर मिलले २६ करोड, इन्दिरा सुगर मिलले ४ करोड ७० लाख, लुम्बिनी सुगर मिलले ८ करोड ४१ लाख तथा अन्नपूर्ण सुगर मिलले १७ करोड रुपैयाँ किसानलाई बुझाउन बाँकी छ ।