नेकपाका कार्यकारी अध्यक्ष पुस्पकमल दाहाल प्रचण्डले हाइड्रोपावरको आर्थिक कारोबारका विषयमा आलोचना खेपीरहेका नेकपाका प्रवक्ता नारायणकाजी श्रेष्ठलाई अनावश्यक विवादमा तानेको वताएका छन् । 

दाहालले श्रेष्ठको बचाउ गर्दै अनावश्यक प्रचारको पछि नलाग्न आग्रह गरे । नेकपाका केन्द्रीय सदस्य कमानसिंह लामासँग भएको कुराकानीको अडियो तथा भिडियो सार्वजनिक भएपछि श्रेष्ठ विवादमा तानिएका थिए ।

आइतबार बालुवाटारमा बसेको स्थायी कमिटीको बैठकमा वोल्दै नेता दाहाले प्रवक्ता श्रेष्ठलाई अनावश्यक रुपमा जोडेर प्रचार भइरहेको वताए । लामा र हाइड्रोपावरका सम्बन्धित व्यक्तिलाई सँगै राखेर उनीहरूबीच रहेको लेनदेन विवादमा मिल्नुस् भन्नेबाहेक अरु कुनै पनि कुरा नगरेकाले भ्रममा नपर्न पनि दाहालले आग्रह गरेका थिए ।

अर्कोतर्फ पूर्वसञ्चारमन्त्री एवम नेकपाका केन्द्रिय सदस्य गोकुल बास्कोटाले भने श्रेष्ठलाई आफूबाट सिक्न आग्रह गरेका छन् । सुरक्षण मुद्रण खरीद प्रकरणमा ७० करोडको अडियो प्रकरणमा मुछिएपछि मन्त्री पदबाट राजीनामा दिएका बास्कोटाले प्रवक्ता श्रेष्ठलाई लक्षित गर्दै भने, ‘आदर्श नेताले मबाट सिक्ने के ! कम्तिमा मेरोजति गरिदिएको भए राम्रो हुन्थ्यो होला ।’

आरोप उठ्नासाथ आफू र पूर्वसभामुख कृष्णबहादुर महराले छानबिनका लागि बाटो छोडिएको स्मरण गर्दै बास्कोटाले प्रश्न उठेपछि छानबिन गर भन्न सक्नुपर्ने बताए । विराटनगरमा आईतवार आयोजित पत्रकार सम्मेलनमा वोल्दै उनले यस्तो वताएका हुन्।