निषेधाज्ञा तोडेको आरोपमा नेपाली कांग्रेसका वरिष्ठ नेता रामचन्द्र पौडेल पक्राउ परेका छन् । तनहुँ प्रहरीले उनलाई नियन्त्रणमा लिएको हो । 

बुधबार व्यास नगरपालिका–१ स्थित तालघरे र दुम्सी जोड्ने पुल उद्घाटनको विषयलाई लिएर कांग्रेस र राष्ट्रिय युवा संघबीच विवाद चर्किएपछि जिल्ला प्रशासन तनहुँले सो क्षेत्रमा बुधबार मध्याह्न १२ बजेबाट साँझ ६ बजेसम्मलाई निषेधाज्ञा लगाएको छ ।

निषेधाज्ञा जारी गरेपछि प्रहरी र युवा नेताहरुबीच केही बेर झडप भएको थियो । स्थितिलाई नियन्त्रणमा लिन प्रहरीले अश्रु ग्यास समेत प्रहार गरेको थियो ।
यसै मेसोमा नेता पौडेल निषेधाज्ञा तोड्दै पुल उद्घाटनमा जान खोजेपछि नियन्त्रणमा लिएको तनहुँका एसपी अरुण पौडेलले बताए ।