वरिष्ठ नेता रामचन्द्र पौडेल तथा केन्द्रिय सदस्य शेखर कोईरालाले सर्वोच्च अदालतले नगरे सडकवाट संसद पुनर्स्थापना गर्ने वताईरहँदा कांग्रेस सभापति शेरबहादुर देउवाले भने अदालतमा विचाराधीन मुद्दामा नबोल्ने बताएका छन् ।

भक्तपुरमा आयोजित पार्टीको विरोध सभामा बोल्दै देउवाले भने–‘अदालतमा विचाराधीन मुद्दामा यो गर यो नगर भनेर कांग्रेस बोल्दैन । कांग्रेस अदालत मान्ने पार्टी हो ।’ 

सरकारले, संसद्ले बदमासी गरेपनि अन्तिम निकाय भनेको न्यायालय हो भन्दै उनले ‘अदालतलाई धम्क्याएर, तर्साएर निर्णय गराउने होइन’ भने । 

सभापति देउवाले प्रधानमन्त्री ओलीको संसद् विघटन गर्ने निर्णय भने असंवैधानिक र अलोकतान्त्रिक भएको बताए । उनले सरकारले संसद् विघटन गरेर निर्वाचनसमेत घोषणा गरिसकेकाले अब कसरी जाने भन्नेबारे छिट्टै केन्द्रीय समितिको बैठकले टुंगो लगाउने बताए ।

सरकारको कदमको विरोध गर्ने तर त्यसबारे अदालतले जस्तो निर्णय दिएपछि स्वीकार गर्ने सभापति देउवाले बताए । 

प्रधानमन्त्री ओलीको कदमको विरोधमा आयोजित सभामा देउवाले पटकपटक अदालतमा विचाराधीन मुद्दामा यस्तै हुनुपर्छ भनेर पार्टीका कुनै पनि नेताले भन्न नहुने बताए । त्यसो गर्नु भनेको अदालतलाई धम्क्याएको हुने उनको भनाइ थियो ।