नेपाल कम्युनिस्ट पार्टी प्रचण्ड–माधव नेपाल समूहका अध्यक्ष पुष्पकमल दाहाल ‘प्रचण्ड’ले नेपाली कांग्रेसलाई मध्यावधि निर्वाचनको सपना नदेख्न आग्रह गरेका छन् । संसद् विघटनविरुद्ध मंगलबार भृकुटीमण्डपमा आयोजित सभामा उनले कांग्रेसतर्फ संकेत गर्दै यस्तो आग्रह गरेका हुन् ।

चुनाव हुन्छ भन्नेमा प्रधानमन्त्री केपी ओलीलाई समेत विश्वास नभएको आफनो जानकारीमा आएको वताएका दाहालले ‘हुँदा–खादाको बहुमत बिगार्नेले चुनाव गराउँछन् भन्नेमा विश्वास नगर्न पनि आग्रह गर्छु।’ वैशाखबाट उता ओली प्रधानमन्त्री नरहने र उनको पत्तासाफ हुने पनि प्रचण्डले बताए । वैशाखमा चुनाव नहुने उनले ठोकुवा पनि गरे ।

‘कतिपय मानिसहरुलाई कम्युनिस्ट पार्टी विभाजन भएको र मध्यावधि निर्वाचन भइहाल्यो भने जितिहालिन्छ नि भनेर अलिअलि सपना देख्न खोज्या कुरा पनि सुनिन्छ,’ कांग्रेसतर्फ संकेत गर्दै उनले भने, “म ती साथीहरुलाई त्यस्ता सपना नदेख्न, दुस्वप्न हो भन्ठान्छु । यो हुनेवाला चुनावको घोषणा भएकै होइन । यति तथ्य भन्दाभन्दै पनि भ्रममा पर्यौ भने हामी बर्बाद हुन्छौं, नेपाल बर्बाद हुन्छ ।’ 

प्रचण्डले केपी ओलीलाई कसैले गोटिको रुपमा प्रयोग गरेको पनि आशंका गरे । ‘मलाई लाग्छ, केपी ओली गोटी भएका हुन् । वैशाखपछि उनी प्रधानमन्त्री पनि रहँदैनन्’ दाहालले भने–‘नेपालको राजनीतिक इतिहासबाट तिनको पत्तासाथ हुनेबाला छ ।’