चिनियाँ हस्तक्षेपविरुद्ध ठाँउ ठाउँमा प्रदर्शन
काठमाडौं । चिनियाँ हस्तक्षेप बढेको भन्दै ‘स्वतन्त्र युवा’ नाम गरेको संगठनले मंगलबार साँझ काठमाडौैंमा मसाल जुलुस निकालेको छ ।
चिनियाँ हस्तक्षेप बन्द गर, चिनियाँ दूतावास मुर्दाबाद भन्दै नारा लगाउँदै हात्तीसारस्थित चिनियाँ दूतावासको कन्सुलर भवनदेखि लाजिम्पाटस्थित राष्ट्रपति कार्यालयसम्म मसाल जुलुस प्रदर्शन गरिएको थियो ।
काठमाडौं र पोखरामा एक साथ निकालिएको जुलुसबाट प्रहरीले २५ जना पक्राउ गरेको छ । काठमाडौंबाट आठ र पोखराबाट १७ जनालाई पक्राउ गरिएको सो संगठनका एक सदस्यले बताए ।
चीनको चार सदस्यीय प्रतिनिधिमण्डलले नेपालका राष्ट्रपति विद्यादेवी भण्डारी, प्रधानमन्त्री केपी ओली, नेकपा अध्यक्ष पुष्पकमल दाहाल प्रचण्ड र माधवकुमार नेपाल, प्रमुख प्रतिपक्षी दल नेपाली कांग्रेसका सभापति शेरबहादुर देउवा, जसपा अध्यक्ष बाबुराम भट्टराईलगायतसँग भेटवार्ता गरेको थियो ।
चिनियाँ उपमन्त्री गोउ यचौंको नेतृत्वमा आएको टोलीले आफूखुसी नेपालका नेताहरु भेट्दै सुझावका नाममा हस्तक्षेप गरेपछि स्वतन्त्र युवा नामक संगठनले विरोध जनाउँदै प्रदर्शन गरेको हो ।
