अटोमा छुटेको साढे ७ लाखसहितको झोला चालकले गरे फिर्ता
नेपालगञ्ज उपमहानगरपालिका–१४ का अटोरिक्सा चालक देवराज बर्माले रिक्सामा छुटेको सात लाख ४० हजार रुपैयाँ सहितको झोला सम्वन्धित धनिलाई फिर्ता गरेका छन् ।
दाङको घोराही उपमहानगरपालिका–५ का दत्तबहादुर नाथको झोला अटोरिक्सामा छुटेको थियो । सोमवार भारतबाट घर फर्कने क्रममा रहेका उनको झोला छुटेको जानकारी पाउनासाथ दत्तवहादुरले प्रहरीलाई खवर गरेका थिए ।
करिव साढे ७ लाख रुपैयाँसहितको झोला हराएको जानकारीपछि प्रहरीले सिसी क्यामेराको मद्दतले नाथ चढेको भे१ह ५०१९ नम्वरको अटोरिक्सा पहिचान गरेको थियो । प्रहरीले अटो चालकलाई सो विषयमा जानकारी गराई रकम फिर्ता गर्न आग्रह गरेको थियो ।
‘अटो चालक बर्मालाई सम्पर्क गरी रकमसहितको झोला मगायौं’ जिल्ला प्रहरी कार्याल बाँकेका एसपी ओमबहादुर रानाले भने–‘उनी झोला बोकेर प्रहरी कार्यालय आए र प्रहरीकै रोहवरमा सम्बन्धित व्यक्तिलाई फिर्ता गरे।’
