महेन्द्रनगरः कञ्चनपुर सदरमुकाम महेन्द्रनगरमा चलिरहेको सुदूरपश्चिम औद्योगिक व्यापार मेला तथा कञ्चनपुर पर्यटन महोत्सव–२०७६ बाट ५ जनालाई नियन्त्रणमा लिइएको हो । 

गायिका ज्योति मगर स्टेजमा नाचिरहँदा उत्तेजित युवाहरुको समूहले होहल्ला गर्दै मञ्चमै चढ्ने प्रयास गरेपछि मेलामा झडपको स्थिति आएको थियो । सोमबार गायिका मगर, गायक सुरेश चोखाल, बेली डान्सर बिनु शाक्यको प्रस्तुति रहेको थियो । ज्योति मगरको प्रस्तुतिका बेला होहल्लाका साथै उच्छृंखल गतिविधि भएको हो । उत्तेजित भिडलाई नियन्त्रणमा लिन प्रहरीले लाठीचार्जसमेत गरेको छ । त्यसक्रममा केही युवा घाइते भएका छन्।

झडपमा तीन प्रहरीसमेत घाइते भएका प्रहरीले जनाएको छ । महोत्सवमा उच्छृंखल गतिविधि गर्ने ५ जनालाई नियन्त्रणमा लिएको जिल्ला प्रहरी कार्यालय कञ्चनपुरका प्रहरी निरीक्षक सुरज कार्कीले बताए। पक्राउ पर्नेमा भुवन विष्ट, २२ वर्षीय महेन्द्र बुढा, २१ वर्षीय दिलिप विष्ट, २३ वर्षीय अभिसेक खड्का र २४ वर्षीय भुवन विष्ट छन्।
 
महोत्सवको स्टेज अगाडि निर्माण भएको काठको पर्खालमा समेत युवाहरुको समूहले क्षति पुर्‍याएको छ। युवाहरुको समूह मेला सचिवालय रहेको स्टिलमा समेत पुगेको थियो। 
 

कञ्चनपुर ज्योति मगर महोत्सव