काठमाडौंः चीनमा कोरोना भाइरसबारे चेतावनी दिने एक चिकित्सकको ज्यान गएको छ । चीनको वुहान प्रान्तको आपतकालीन उपचार केन्द्रमा कार्यरत चिकित्सक ली वेनलिङको भाइरसकै कारण ज्यान गएको हो । 

उनले सहकर्मीलाई यसअघि नै भाइरसको प्रकोपको बारेमा बताउँदा अफवाह फैलाएको भन्दै प्रशासनले चेतावनीसमेत दिएको बताइएको छ । नेत्र रोग विशेषज्ञ लीले यसअघि २००३ मा फैलिएको सार्सजस्तै कोरोना भाइरसबाट महामारी फैलनसक्ने बताएका थिए ।

यता चीनको सरकारी निकायले भाइरसका कारण ५६० जनाको मृत्यु भएको जनाएको छ । भाइरसबाट २८ हजारभन्दा बढी प्रभावित भएको बीबीसीेले उल्लेख गरेको छ ।

यसैबीच चीनले प्रकोप नियन्त्रणका लागि अझै प्रतिबन्धात्मक उपायहरु अपनाइरहेको जनाएको छ । प्रशासनले विभिन्न सार्वजनिक समारोहमा सहभागी हुन प्रतिवन्ध लगाइएको छ भने सर्वसाधारणलाई अत्यावश्यक काम बाहेक घर बाहिर निस्कन पनि रोक लगाइएको छ । एजेन्सी 

कोरोना भाइरस ली वेनलिङ