बैतडीः सिकाउँदै गर्दा कार दुर्घटना हुँदा बैतडीमा एक जनाले ज्यान गुमाएका छन् । दुर्घटनामा एकजना घाइते भएका छन् ।  

बैतडीका प्रहरी प्रमुख प्रहरी नायव उपरीक्षक डिल्लीनारायण पाण्डेयका अनुसार दुर्घटनामा ज्यान गुमाउनेमा कार मालिक दशरथचन्द नगरपालिका–४ शाहीलेकका २८ वर्षीय हरिश तिरुवा रहेका छन् ।

बिहीवार राति बा ६ प ९१९९ नम्बरको कार दशरथचन्द नगरपालिका–२ देहीमाण्डौंस्थित घुसल्ला मोड नजिककै निर्माणधिन क्याम्पसको मैदानमा सिकाउने क्रममा दुर्घटनामा परेको हो । दुर्घटनाग्रस्त कार मैदानभन्दा करिब १०० मिटर तल खसेको प्रहरीले जनाएको छ ।

दुर्घटनामा परी कृषी विकास बैंक शाखा शाहीलेक बैतडीका शाखा प्रबन्धक डिकरदेव पाण्डेय घाइते भएका छन् । घाइते पाण्डेयको जिल्ला अस्पतालमा उपचार भइरहेको छ । 

बैतडी कार दुर्घटना