सरकारले  लामो दूरीका सार्वजनिक सवारीका साधन सञ्चालनमा रोक लगाउने निर्णय गरेपछि लाखौँ मानिसले काठमाडौँ छाडेका छन् ।

कोरोना भाइरसको संक्रमण रोक्नका लागि गत बुधबार सरकारले गरेको यस्तो निर्णयपछि राजधानी छाडेर गृहक्षेत्र फर्कनेहरुको संख्या ह्वात्तै बढेको हो ।

सरकारी घोषणापछि आइतबार दिउँसोसम्म झण्डै ८ लाख  भन्दा धेरै मानिसले काठमाडौँ छाडेका छन् । शनिबारसम्म ७ लाख भन्दा धेरै मानिसले उपत्यका छोडेका थिए । स्कुल कलेज लगायत अत्यावश्यक बाहेकका कार्यालयहरु चैत मसान्तसम्म बन्द गर्ने सरकारी निर्णयपछि गृहक्षेत्र फर्कनेहरुको संख्या व्यापक रुपमा बढेको हो।

आइतबार बिहान मात्रै झण्डै एक लाख २८ हजार व्यक्ति काठमाडौँबाट बाहिरिएको प्रहरीले जनाएको छ। सार्वजनिक सवारीमा रोक लगाउने सरकारी घोषणापछि आइतबार साँझसम्म काठमाडौँ छाड्नेको संख्या ९ लाख हाराहारी पुग्ने अनुमान गरिएको छ ।

शनिबार मात्रै उपत्यकाबाट २ लाख ६ हजार ३ सय ३९ जना बाहिरिएको ट्राफिक प्रहरीको तथ्यांक छ। प्रहरीको तथ्यांक अनुसार चैत १ गते ७१ हजार ५ सय ५६ जनाले काठमाडौँ छोडेका छन्।

२ गते ८६ हजार ३२७ जना, ३ गते ८८ हजार २ सय १ जना, ४ गते ९१ हजार ८१६ जना, ५ गते ९५ हजार २४७, ६ गते १ लाख ८ हजार ४५८ जना र ७ गते १ लाख ३० हजार ८२२ जनाले काठमाडौँ छोडेका छन्।

काठमाडौँ छोडेर बाहिर जानेको संख्या बिहीबार र शुक्रबार एक लाख भन्दा बढी छ।