कोरोना भाइरसको जोखिम रोक्न याे वर्ष होली नमनाउन सरकारको आग्रह
काठमाडौंः कोरोना भाइरस संक्रमणको सम्भावित जोखिमलाई मध्यनजर गर्दै सरकारले यो वर्ष होली पर्व नमनाउन आग्रह गरेको छ । सोमबार परराष्ट्रमन्त्री प्रदीपकुमार ज्ञवालीले मन्त्रालयमा आयोजित पत्रकार सम्मेलनमा यस्तो आग्रह गरे ।
उनले यस वर्षको होली उत्सव नमनाउन र ठूला जमघट नगर्न आग्रह गरे । कोरोनाको सम्भावित संक्रमण रोकथामका लागि सरकार गम्भीर बनेको भन्दै उनले नागरिकहरुलाई भरसक भीड हुने कार्यक्रम नगर्न, सहभागी नहुन अनुरोध गरे । उनले भने, ‘भीडभाड हुने गरी कुनै काम नगरौं । सकभर भीड हुने कामबाट टाढै बसौँ । यसपटक होली पनि नमनाऔं ।’
उनले विवाहजस्ता उत्सवलाई पनि आफ्नो पारिवारिक विषय मात्रै बनाउन र ठूला भेला, भोजभतेर नगर्न आग्रह गरे । नेपाल कोरोना भाइरसबाट मुक्त रहेको भन्दै उनले हुनसक्ने संक्रमणबाट जोगाउनका लागि सबै सचेत बन्नुपर्ने बताए । जोखिम बढ्न नदिन सरकारले विभिन्न कदम चालिरहेको उनको भनाइ थियो ।
उनले उपप्रधान तथा रक्षामन्त्री ईश्वर पोखरेलको नेतृत्वमा मन्त्रीहरु सम्मिलित कोरोना भाइरस रोकथाम समन्वय समिति गठन गरेको र मुख्य सचिवको नेतृत्वमा स्टेरिङ कमिटी तथा प्रधामन्त्री कार्यालयका सचिव नारायणप्रसाद बिडारीको संयोजकत्वम वर्किङ टिमले यसका लागि काम गरिरहेको जानकारी पनि दिए । विदेशी पर्यटकलाइ अन–अराइभल भिसा स्थगित गरेको र कोरोना प्रभावित देशमा अध्ययन गर्न जाने नेपाली विद्यार्थीलाई एनओसी (नो अब्जेक्सन लेटर) जारी गर्न रोक लगाएको पनि बताए ।
कोरोना भाइरस प्रदीपकुमार ज्ञवाली होली पर्व