झापाः कोरोना भाइरस भित्रन नदिन झापाको चन्द्रगढी विमानस्थलमा आजदेखि कोरोना भाइरस हेल्थ डेस्क स्थापना गरिएको छ । विभिन्न ठाउँबाट आएका मानिसको आवतजावत हुने भएकोले कारोना भाइरसविरुद्ध सचेतना अपनाउँदै विमानस्थलमा हेल्थ डेस्क स्थापना गरिएको हो ।

भद्रपुर नगरपालिकाको स्वास्थ्य शाखाको व्यवस्थापन तथा जिल्ला प्रशासन कार्यालय र जिल्ला स्वास्थ्य कार्यालयको समन्वयमा विमानस्थलमा ‘कारोना भाइरस परामर्श तथा प्राथमिक परीक्षण कक्ष’ आजदेखि सञ्चालनमा आएको नागरिक उड्डयन प्राधिकरण भद्रपुरका प्रमुख पूर्णप्रसाद चूडालले जानकारी दिए ।

कक्षलाई एक थान इन्फोरेट थर्मामिटर (ज्वरो नाप्ने यन्त्र) प्राप्त भएको छ । भद्रपुर बिमानस्थल प्रयोग गरी काठमाडौं जाने यात्रुको सो यन्त्रको माध्यमबाट ज्वरो नापिनेछ । ९८.६ डिग्रीभन्दा माथि तापक्रम भएका यात्रुलाई परामर्शसहित यात्रा नगर्न सल्लाह दिइनेछ भने निकै ज्वरो आएको यात्रु भेटिएमा नजिकको अस्पतालमा रेफर गरिने स्वास्थ्य कार्यालयका निमित्त प्रमुख ईश्वरीप्रसाद पौडेलले बताए । 

मानिसको निकै चाप रहने विमानस्थलमा निकै सावधानी अपनाउनुपर्ने र कोरोना भाइरसविरुद्धको सचेतना प्रचार सामग्री वितरण गरिनुपर्ने मेची अञ्चल अस्पतालका मेडिकल सुपरिन्टेन्डेन्ट डा. पिताम्बर ठाकुरले जानकारी दिए ।  

चन्द्रगढी विमानस्थल कोरोना भाइरस हेल्थ डेस्क