काठमाडौंः नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले संघीय लोकतान्त्रिक गणतन्त्रमा आइपुग्न महिलाहरुको योगदान महत्वपूर्ण रहेको बताएका छन् ।

आज ११० औँ अन्तर्राष्ट्रिय श्रमिक महिला दिवसको अवसरमा सन्देश व्यक्त गर्दै अध्यक्ष प्रचण्डले यस्तो बताएका हुन् ।

उनले जनयुद्ध, ऐतिहासिक जनआन्दोलन लगायत परिवर्तनका सबै आयामहरुमा नेपाली महिलाको अग्रमोर्चामा रहेर नेतृत्व गरेको तथ्य नेपाली राजनीतिक इतिहासमा स्वर्ण अक्षरले लेखिएको बताएका छन् ।

अध्यक्ष प्रचण्डले शुभकामना सन्देश भनेका छन्, ‘महान् जनयुद्ध, ऐतिहासिक जनआन्दोलन लगायतका परिवर्तनका सबै आन्दोलनहरुमा नेपाली महिलाहरुले अग्रमोर्चामा रहेर नेतृत्व गरेको तथ्य नेपाली राजनीतिक इतिहासमा स्वर्ण अक्षरले लेखिएको छ । महिलाहरुको त्यो साहस, त्याग र बलिदानीले आज हामी संघीय लोकतान्त्रिक गणतन्त्रमा आइपुगेका हौं ।’

उनले ८ मार्च विश्वभरका महिलाहरुका लागि मात्र नभएर मानव समुदायकै लागि ऐतिहासिक दिन रहेको बताएका छन् ।

अध्यक्ष प्रचण्डले वर्तमान सरकारले महिलाहरुलाई अधिकार सम्पन्न बनाएकाले संवैधानिक, कानूनी र व्यवहारिकरुपमा प्राप्त अधिकारको पूर्ण कार्यान्वयन तथा थप अधिकारका लागि एक भएर लाग्ने सबैमा प्रेरणा मिलोस् भन्दै शुभकामना दिएका छन् ।

पुष्पकमल दाहाल ‘प्रचण्ड’ महिला श्रमिक महिला दिवस