कैलाली, कञ्चनपुर र बाग्लुङमा र्यापीड टेष्ट गर्न आजै टोली परिचालन हुने
काठमाडौं। कैलाली, कञ्चनपुर र बाग्लुङमा कोरोना भाइरसको र्यापीड टेष्ट गर्न आजै टोली परिचालन हुने भएको छ।
स्वास्थ्य तथा जनसंख्या मन्त्रालयले मन्त्रिपरिषद् बैठकले गरेको निर्णय अनुसार कैलाली, कञ्चनपुर र बाग्लुङमा र्यापीड परीक्षणको काम शुरू गर्न आजै टोली परिचालन हुने जानकारी दिएको छ।
स्वास्थ्यका निकायबीचको आज भएको छलफलपछि खटिने टोलीलाई अभिमुखिकरण गरेर आजै खटाउन लागिएको मन्त्रालयको नियमित पत्रकार सम्मेलनका क्रममा मन्त्रालयका प्रवक्ता डा. विकास देवकोटाले बताए।
कैलाली र कञ्चनपुरमा क्वारेन्टाइनमा रहेका २ जना संक्रमित देखिएपछि त्यहाँ र्यापीड टेस्ट गर्ने निर्णय भएको भन्दै उनले बाग्लुङसहित गरेर तीनवटै जिल्लामा टोली हिँड्ने तयारीमा रहेको बताए।
टोलीले तीन जिल्लाका क्वारेन्टाइनमा रहेका व्यक्तिहरू र संक्रमितका परिवार तथा सम्पर्कमा रहेकाहरूको र्यापीड रूपमा आरडीटी प्रविधिबाट परीक्षण गरिने र त्यसमा कसैमा पोजिटिभ देखिएमा पुनः पीसीआर प्रविधिबाट परीक्षण गरिने मन्त्रालयले जनाएको छ।
आजै इपिडिमियोलोजी तथा रोग नियन्त्रण महाशाखा, राष्ट्रिय जनस्वास्थ्य प्रयोगशाला र अन्य स्वास्थ्यका शाखाहरूले छलफल गरेका थिए।
