वारा– पत्रकार बिरेन्द्र साहको अपहरण तथा हत्यमा संलग्न मुख्य अभियुक्त हरेराम पटेल भन्ने हरेराम प्रसाद कुर्मीलाई प्रहरीले १३ वर्षपछि पक्राउ गरेको छ ।

बारा कोल्हवी नगरपालिका–४ सपही टोलवाट उनलाई पक्राउ गरिएको हो । पत्राकार साहको हत्यापछि फरार रहेका कुर्मी बारा जिल्लाको विभिन्न स्थानमा लुकिछिपी वस्ने गरेको सुचना र प्राविधिक अनुसन्धानपछि विहिवार पक्राउ गरिएको प्रहरीले जनाएको छ ।

२०६४ असोज १८ गते बाराको इनर्वासिरा– ८ का पत्रकार साहलाई कुर्मिसहितको समुहले अपहरण गरी गोली हानेर हत्या गरेको प्रहरीको भनाई छ । मृतक साहको शव वाराको डुमरवाना –७ स्थित जंगलमा खाल्टो खनि गाडेको अवस्थामा २०६४ कात्तिक २२ गते फेला परेको थियो ।

अपहरण र हत्यामा संलग्नहरुको पहिचान र केहिलाई प्रहरीले पक्राउ गरी मुद्दा चलाएको थियो । जसमध्ये बाराको ईनर्वासिरा–९ का मनेजर गिरीलाई २०६५ असोज १९ गते र खोपवा–८ का राम एकवाल सहनीलाई २०६५ पुष २१ गते प्रहरीले पक्राउ गरेको थियो । उनीहरुको हकममा अदालतले सर्वस्वसहित जन्म कैदको फैसला गरेको छ ।

यसैगरी, बाराको गडहल–५ का कुन्दन फौजदार भन्ने नरेन्द्र फौजदारलाई बारा जिल्ला अदालतको २०७६ फागुन २९ गतेको निर्णय अनुसार पुर्पक्षको लागि कारागार चलान गरिएको छ ।

बारा जिल्ला अदालतको २०६८ जेठ १६, पुनरावेदन अदालत हेटौडाको २०६९ साउन १६ र सर्वोच्च अदालतको २०७३ पुष २० गतेको फैसला अनुसार हरेरामको मुद्दा मुल्तविमा राखिएको थियो ।