सामूहिक बलात्कारमा पर्दा समेत गाउँलेले प्रहरीमा उजुरी गर्न नदिएपछि सप्तरीमा एक किशोरीले आत्महत्या गरेकी छिन् ।
डाकनेश्वरी नगरपालिका–७ की १७ वर्षिया खुसी (नाम परिवर्तन) ले मंगलवार आत्महत्या गरेकी हुन् ।

गाउँमा बसेको ‘पञ्चायती (वैठक) ले उनलाई प्रहरीमा उजुरी गर्न रोक लगाएको थियो । सोहि आरोपमा प्रहरीले गाउँका ४ जना पञ्चलाई पक्राउ गरिएको जनाएको छ ।

जयकान्त मण्डल, वासुदेव मण्डल, सत्यनारायण मण्डलसहित ४ जनालार्य पक्राउ गरिएको जिल्ला प्रहरी कार्यालय सप्तरीका इन्स्पेक्टर सन्तोष खड्काले जानकारी दिए । उनीहरुले गत सोमवार किशोरी बलात्कृत भएपछि पीडित र परिवारलाई प्रहरीसम्म जान रोकेको र पिडकहरुलाई ५५ हजार रुपैयाँ तिराउने निर्णय सुनाएका थिए ।

पञ्चको ‘फैसलामा चित्त नवुझेर पीडितले आवेशमा आई आत्महत्या गरेको प्रारम्भिक अनुसन्धानवाट खुलेको छ । वालिकाको शव पोष्टमार्टमकालागि धरान पठाईएको जिल्ला प्रहरी कार्यालय सप्तरीले जनाएको छ ।

घटनापछि आरोपीहरु १८ वर्षीय रञ्जित मण्डल, १९ वर्षीय बब्लु मण्डल, ३० वर्षीय धर्म मण्डल, ३५ वर्षीय विष्णु मण्डल भने फरार रहेको प्रहरीले जनाएको छ ।